Ўзбекистон Республикаси Сув хўжалиги вазирлиги ва Жиззах вилоятида фаолият юритаётган “Насосчилар чорваси” МЧЖ ўртасида имзоланган битимга биноан “Зарбдор-1”, “Зарбдор-2” ва “Оқбулоқ” насос станциялари бундан 3 йил аввал давлат-хусусий шериклик шартлари асосида ташаббускор тадбиркор тасарруфига ўтган эди.
Сирдарё-Зарафшон ирригация тизимлари ҳавза бошқармаси Давлат-хусусий шериклик лойиҳаларини шакллантириш ва жорий этиш бўлими томонидан ташкил этилган семинарда ана шу битим шартларининг бажарилиши таҳлил қилинди.
“Насосчилар чорваси” МЧЖ раҳбари Н.Худойқулов анжуманда сўзга чиқиб, ДХШ лойиҳаси асосида фаолият юритишнинг қулайлик ва афзалликлари ҳақида батафсил маълумот берди. Жумладан, ўтган йиллар давомида мазкур насос станцияларига шартномадаги 643,1 миллион сўм ўрнига 695,9 миллион сўм инвестиция киритилган. 2023 йилнинг ўзида 120 минг киловатт электр энергияси тежалиб, Зарбдор тумани экинзорларига 5 миллион метр куб сув етказиб берилди.
“Оқбулоқ” насос станциясига биттадан янги насос агрегати ва электродвегатель қўйилгани, бошқа иншоотларда ҳам таъмирлаш ва тиклаш, ободонлаштириш ишлари бажарилиб, улардаги жами 21 нафар ишчи-ходимнинг унумли меҳнати учун шарт-шароит яратилгани айтиб ўтилди.
Сирдарё-Зарафшон ИТҲБ матбуот хизмати