Бугун Хитойнинг “CITIC Construction Co., Ltd” компанияси президенти Ян Цзяньцян бошчилигидаги делегация Сув хўжалиги вазирлигига ташриф буюрди.
Айтиш жоизки, жорий йил 24-25 январь кунлари Хитой Халқ Республикасига давлат ташрифи чоғида Ўзбекистон Республикаси Президенти Шавкат Мирзиёев Пекин шаҳрида CITIC корпорацияси раҳбари Си Гохуа билан учрашув ўтказган эди.
Хитой мулкни бошқариш бўйича халқаро инвестиция корпорацияси молиявий хизматлар кўрсатувчи ҳамда йирик саноат ва инфратузилма лойиҳаларини амалга оширувчи етакчи компаниядир. Унинг активлари қарийб 1,5 триллион долларни ташкил этади.
Учрашувда қўшма лойиҳалар портфелини кенгайтириш масалалари кўриб чиқилиб, мамлакатимиз ирригация тизимларини модернизация қилишга ҳам эътибор қаратилган эди.
Давлат ташрифи доирасида Ўзбекистон Республикаси Сув хўжалиги вазирлиги ва Хитойнинг “CITIC Construction Co., Ltd” компанияси ўртасида ҳамкорлик меморандуми имзоланган эди.
“CITIC Construction Co., Ltd” компанияси CITIC давлат корпорациясининг холдинг компанияси ҳисобланади. Инжиниринг бўйича комплекс хизматларнинг йирик провайдери сифатида халқаро инжиниринг бозорининг энг фаол иштирокчиларидан бири. Марказий Осиё, Шарқий Европа, Жануби-Шарқий Осиё, Африка, Жанубий Америка мамлакатларида йирик лойиҳаларни амалга ошириб, улкан тажриба тўплаган.
Мулоқот чоғида Сув хўжалиги вазири Шавкат Хамраев нуфузли делегациянинг вазирликка ташрифидан мамнун эканлигини таъкидлади. Келгусида ушбу компания билан ҳамкорликда кўплаб лойиҳалар амалга оширилишига умид билдирди.
Ўз навбатида “CITIC Construction Co., Ltd” компанияси президенти Ян Цзяньцян самимий ва илиқ қабул учун миннатдорлик билдирди. Ўзбекистонда йирик лойиҳаларни амалга оширишдан, бу жараёнда Сув хўжалиги вазирлиги билан ҳамкорлик қилишдан манфаатдор эканлигини эътироф этди.
Музокара якунида Ўзбекистон Республикаси Сув хўжалиги вазирлиги ва Хитойнинг “CITIC Construction Co., Ltd” компанияси ўртасида Ўзбекистонда каналларни бетонлаштириш, сув омборларини қуриш ва насос станцияларини модернизация қилиш лойиҳаларини амалга ошириш тўғрисида келишув имзоланди.
– Ушбу келишув нафақат узоқ муддатли ҳамкорлигимизга, боқий дўстлигимизга ҳам пойдевор бўлиб хизмат қилади, – деди Ян Цзяньцян.
Музокара якунида меҳмонлар вазирлик делегациясини компаниянинг фаолияти, хусусан, сувни тежаш бўйича қўлланилаётган илғор технологиялар билан танишиш учун Хитойга таклиф қилди.
Ахборот хизмати