Жорий йилнинг 28 январь куни Ўзбекистон Республикаси Сув хўжалиги вазирлигида Осиё инфратузилмавий инвестициялар банкининг (ОИИБ) инвестиция операциялари бўйича вице-президенти Константин Лимитовский билан учрашув ўтказилди.
Учрашувда меҳмонга Ўзбекистон Республикаси Сув хўжалигини ривожлантиришнинг 2020–2030 йилларга мўлжалланган концепцияси ва унда белгиланган устувор вазифалар, шунингдек, Сув хўжалигида хорижий инвестиция лойиҳаларини амалга ошириш маркази томонидан амалга оширилаётган инвестиция лойиҳалари ҳамда ҳамкорлик алоқалари ўрнатилган халқаро молия институтлари ва хорижий ҳукуматлар молия ташкилотлари тўғрисида батафсил маълумотлар берилди.
Жаноб Лимитовскийнинг таъкидлашича, бугунги кунда, ОИИБ Бухоро вилоятида инфратузилмавий қурилиш лойиҳалари бўйича фаол иш олиб бормоқда. Мазкур лойиҳалар автомобиль йўллари, ичимлик суви таъминоти ва оқава сув инфратузилмаларини қуриш ва модернизация қилишни ўз ичига олади.
Суҳбат давомида жаноб Лимитовский Ўзбекистоннинг сув хўжалигини ислоҳ қилиш, соҳани ривожлантириш концепциясида кўзда тутилган тадбирларни молиялаштиришга тайёр эканлигини билдирди.
Бу борада Самарқанд вилоятидаги “Нарпай” канали, Тошкент вилоятидаги “Тошкент” магистрал канали ва “Жун” канали ҳамда Қорақалпоғистон Республикасидаги “Параллель”, “Қуаниш-Жарма” каналларини реконструкция қилиш, шунингдек, жисмонан эскирган насос станцияларини модернизация қилиш ҳамда давлат-хусусий шерикчилик тамойили асосида лойиҳаларни ишлаб чиқиш ва амалга ошириш таклифлари берилди.
Ўз ўрнида жаноб Лимитовский мазкур лойиҳаларни қўллаб-қувватлаб, ОИИБнинг асосий мақсади иқтисодиётнинг инфратузилма ва бошқа ишлаб чиқариш тармоқларига сармоя киритиш орқали барқарор иқтисодий ривожланиш, фаровонликни ошириш ва Осиёда инфратузилма алоқаларини яхшилашга кўмаклашишдан иборатлигини таъкидлади.
Учрашув якунида берилган лойиҳа таклифларини ОИИБга киритилишига келишиб олинди.
Матбуот хизмати