Азизбек яқиндагина вазирликда стажёр сифатида иш ўрганиб юрган эди. Ички ариқларни бетонлаш сифати ҳақида материал тўплаш учун Олтинкўл туманига борганимизда уни учратиб қолдик.
Андижонга қайтганига бир ойдан ошибди. Янги ташкил этилган Олтинкўл тумани “Сув етказиб бериш хизмати” давлат муассасасига раҳбар этиб тайинланибди.
У бизга бир ойнинг нари-берисида қилган ишларини ҳаяжон билан гапириб берди. Ишониб, ишонмай идорасига бордик. Кеч тушиб қолмасдан Андижон шаҳрига қайтишга шошилиб турган эдик. Ёш раҳбарнинг шижоати, оз муддатда қилган ишларини кўриб, анча қолиб кетдик.
Янги раҳбар сифатида идорасига кириш жойини чиройли қилиб қўйибди. Ҳовлига янги дарахтлар экилган. Хоналар ҳам тартибга келтирилган. Орқа томондаги қўшимча бинолар таъмирланган, оқланган.
Ёрдамчи хўжалик ташкил этиш учун қўйхона, қуёнхона ва товуқхона қурибди. Суриштирсак, шу кичкинагина қурилманинг ўзига салкам 11 миллион сўм пул сарфланибди.
- Қўй, қуён, товуқ боқсак, харажаталаримиз шу йилнинг ўзида чиқиб кетади, -дейди ёш раҳбар Азизбек Комилжонов.
Ҳовлидаги иссиқхонага ҳам плёнка ёпилиб, лимон кўчатлари экилибди. Қатор орасида кўкатлар уруғи сепилган.
У ходимлар учун мўъжазгина ошхона ташкил қилаётганини, олам-олам режалари борлигини самимий, юракдан гапириб берди. Ҳамма ишлари янгилиги, кўчатлар ҳам шу бугун экилгани кўриниб турибди.
- Дадам, ҳалол, пок ишла, ўсгин, унгин дейдилар. Шу ўгитларини қулоғимга қуйиб олганман, дейди у.
Олтинкўллик ёш сувчилар “Заковат”нинг вилоят босқичида биринчи ўринни қўлга киритибди. 2-босқичда иштирок этган вилоят ёшлари жамоасида ҳам асосан олтинкўллик сувчилар бўлиб, фаол иштироки учун вазирлик сертификати билан тақдирланишибди.
- Ниятим йил охиригача Олтинкўл тумани “Сув етказиб бериш хизмати” давлат муассасасини республикада энг намунали сув хўжалиги ташкилотига айлантириш. Шу мақсадда тинмай ишлаяпмиз, изланаяпмиз, дейди Азизбек.
Унинг режалари бисёр. Ўзига яраша ташвишлари, ечилиши керак бўлган масалалари бор. Энг муҳими, уни муаммоларни енгиб ўтишга қодир жуда баланд шашти бор.
Шашти, шижоати баланд ана шундай сувчи ёшлар кўпайсин!
Ахборот хизмати