Сирдарё-Зарафшон ИТҲБ ҳузуридаги Насос станциялари ва энергетика бошқармаси тасарруфидаги “Узунбулоқ” насос станцияси ўтган йили давлат-хусусий шериклик тизимига ўтказилиб, “Гидрострой-Мегастрой” МЧЖ бошқарувига берилган эди. Бахмал туманидаги 380 гектардан зиёд майдонни обиҳаёт билан таъминловчи ушбу объектда янги тизимга ўтгандан кейин бўлган ўзгариш ва янгиликлар таҳлил қилинган семинар ташкил этилди.
Тадбирда Сирдарё-Зарафшон ИТҲБ давлат-хусусий шериклик лойиҳаларини шакллантириш ва жорий этиш бўлими бошлиғи Ш.Миртозаев сўз олиб, давлат-хусусий шериклик шартлари, лойиҳа объектини танлаш, унинг консепцияси, баҳоланиши, молиявий ҳисоб-китобларини амалга ошириш тўғрисида батафсил маълумотлар берди.
Давлат-хусусий шериклик тизимида ишни аниқ режа асосида тўғри ташкил қилиш натижасида қўлга киритилиши мумкин бўлган ижобий кўрсаткичлар, объектга киритиладиган инвестициялардан оқилона фойдаланиш самаралари санаб ўтилди.
Таъкидландики, Бахмал туманидаги давлат-хусусий шериклик тизимига ўтган биринчи насос станцияси ва унинг фаолияти кўплаб ташаббускор тадбиркорлар эътиборини ўзига тортмоқда. Уларнинг бир гуруҳи анжуманда иштирок этди ва ўзларини қизиқтирган саволларга атрофлича жавоблар олишди.
Сирдарё-Зарафшон ИТҲБ матбуот хизмати