Бугунги кунда коррупция жаҳон миқиёсида долзарб муаммолардан бири сифатида тан олинган бўлиб, ушбу иллат ҳар қандай давлат ва жамият ривожига жиддий путур етказиши билан хавфлидир.
Коррупционернинг ягона мақсади давлат қонунларини айланиб ўтиб, катта миқдорда моддий бойликка эга бўлиш. Коррупция – жамиятни турли йўллар билан исканжага оладиган даҳшатли иллатдир, десак асло хато қилмаймиз.
“Сувхўжаликназорат” инспекцияси ва унинг ҳудудий бошқармаларида коррупцияга қарши курашиш соҳасида қатъий кураш олиб борилмоқда.
Хусусан, инспекциянинг коррупцияга қарши курашиш сиёсати, коррупциявий хавф-хатарларни баҳолаш услубиёти, манфаатлар тўқнашувини бошқариш тўғрисидаги низом каби 10 дан ортиқ ички идоравий ҳужжатлари ишлаб чиқилиб, амалиётга жорий этилди. Шунингдек, коррупция ҳолатлари ҳақида хабар бериш учун барча турдаги алоқа каналларининг («Ишонч телефони», электрон почта манзиллари, расмий веб-сайт ва ижтимоий тармоқлардаги бошқа саҳифалар) фаолияти йўлга қўйилди.
Бундан ташқари, коррупцияга қарши курашиш, «Коррупцияга қарши курашиш соҳасида комплаенс назорат тизимининг ўрни ва аҳамияти», «Давлат бошқаруви органлари ва маҳаллий ижро этувчи ҳокимият органлари ходимларининг одоб-ахлоқ намунавий қоидалари» каби мавзулар бўйича ходимларнинг ҳуқуқий билимлари оширилди, тизим бўйича 50 дан ортиқ тарғибот ва профилактика тадбирлари ўтказилди.
“Сувхўжаликназорат” инспекцияси ходимлари билан тузилган меҳнат шартномаларига, ходим ўз хизмат вазифаларини бажараётганда коррупциявий ҳатти-ҳаракатларда қатнашмаслик, ўз ваколатларини суиистеъмол қилмаслик каби қатор мажбуриятлар бўйича ўзгартиришлар киритилди.
Шунингдек, коррупцияга қарши курашиш ишлари самарадорлигини рейтинг баҳолаш бўйича амалга ошириладиган тадбирлар рўйхати, коррупция хавф-хатарига энг кўп дуч келадиган ходимлар фаолият соҳалари ва лавозимлари, шунингдек, уларнинг функциялари (ваколатлари)нинг рўйхати, шунингдек, коррупцияга қарши курашиш бўйича 2024 йилга мўлжалланган дастур тасдиқланиб, ижрога қаратилди.
Коррупцияга қарши курашишнинг ташкилий-ҳуқуқий ва молиявий механизмлари такомиллаштирилаётгани, бу жараёнга жамоатчилик ва оммавий ахборот воситаларини жалб қилиш ҳамда коррупциянинг олдини олиш бўйича ички ва идоралараро ҳамкорлик самарадорлигини оширишга қаратилган саъй-ҳаракатлар, албатта, ўз самарасини беради. Бироқ, халқимиз бу жирканч иллатга муросасиз бўлмас экан, таъсирчан жамоатчилик назоратини ўрнатмас экан, бу йўналишдаги мавжуд муаммоларнинг илдизини қуритиб бўлмайди.
Н.Ташбаев,
“Сувхўжаликназорат” инспекциясининг
Коррупцияга қарши ички назорат
бўйича масъул ходими